کہیں ہم اندھے تو نہیں ہورہے ہیں

نئی دہلی، 23 اپریل (یو این آئی) گلوکوما (سیاہ موتیا) آنکھوں کی ایک ایسی بیماری ہے جس میں مریض کو اس کا علم تک نہیں ہوتا اور آنکھوں کی بینائی ہمیشہ کے لیے ختم ہوجاتی ہے۔

قومی راجدھانی کے سر گنگا رام اسپتال کے شعبہ امراض چشم کے سربراہ پدم شری ڈاکٹر۔ (پروفیسر) اے کے گروور نے ہفتے کے روز 'یواین آئی ' کے ساتھ ایک انٹرویو کے دوران کہا، "گلوکوما ایک خاموش بیماری ہے، جو بغیر کسی وارننگ کے خاموشی سے آپ کی بینائی چھین لیتی ہے۔ اس سے بچنے کے لیے 40 سال کی عمر کے بعد ہر سال آنکھوں کا



معائنہ کرانا ضروری ہے جس کی وجہ سے اس بیماری کا ابتدائی مرحلے میں ہی پتہ چل جاتا ہے۔ اگر بروقت علاج شروع کر دیا جائے تو کسی بھی طرح بینائی کا خطرہ نہیں رہتا۔

آل انڈیا انسٹی ٹیوٹ آف میڈیکل سائنسز (ایمس) سے ایم ڈی کی ڈگری کے بعد 1984 میں یہاں کے مولانا آزاد میڈیکل کالج سے بطور ایسوسی ایٹ پروفیسر اپنے پیشہ ورانہ کیریئر کا آغاز کرنے والے ڈاکٹر گروور نے کہا کہ آنکھوں کی تین ایسی سنگین بیماریاں ہیں جو خاموشی سے بینائی چھین لیتی ہیں۔ اسی لیے انہیں 'خاموش امراض' کے زمرے میں رکھا گیا ہے۔