امیتابھ بچن کے ساتھ کام کرنا باعث فخر :آیوشمان

ممبئی، 25 فروری (یو این آئی) بالی وڈ اداکار ایوشمان کھرانہ کا کہنا ہے کہ امیتابھ بچن کے ساتھ کام کرنا کسی بھی فنکار کے لئے باعث فخر بات ہے۔

ایوشمان کھرانہ ان دنوں امیتابھ کے ساتھ فلم ’گلابو ستابو‘ میں کام کررہے ہیں۔

انہوں نے امیتابھ کے ساتھ کام کرنے کے اپنے تجربہ کے بارے میں بتایا کہ امیتابھ کے ساتھ کام کرنا ان کے لئے سیکھنے جیسا تھا۔

ایوشمان نے کہا ’’بچن سر بہت عظیم ہیں میں ہمیشہ ان کی ایک بات نوٹس کرتا ہوں کہ وہ ہمیشہ پہلے سے پوری طرح تیار رہتے ہیں انہیں اپنی لائن تو



معلوم ہوتی ہیں اس کے ساتھ ہی انہیں سامنے والوں کی لائنیں بھی پتہ ہوتی ہیں ۔

ان کے سامنے کام کرنا اتنا آسان نہیں ہے کسی بھی فنکار کے لئے ان کے ساتھ کام کرنا بڑے فخر کی بات ہے‘‘۔

ایوشمان نے بتایا کہ فلم گلابو ستابو ایک سادہ فلم ہے۔

اس فلم کی کہانی ایک مالک مکان اور کرایہ دار کے درمیان مضحکہ خیز تعلقات کے بارے میں ہے۔

فلم میں بچن سر مالک مکان ہیں اور وہ کرایہ دار ہے ۔

دونوں کی آپس میں ان بن رہتی ہے۔

گلابو ستابو ایک مزاحیہ فلم ہے اور اس کی شوٹنگ لکھنؤ میں ہوئی ہے۔