رجنی کانت کو داداصاحب پھالکے ایوارڈ

نئی دہلی ،یکم اپریل (یواین آئی)حکومت نے سال 2019کا داداصاحب پھالکے ایوارڈ معروف فلم اداکار رجنی کانت کو دیئے جانے کا اعلان کیاہے اطلاعات ونشریات کے وزیر پرکاش جاؤڈیکرنے جمعرات کو ٹویٹ کرکے 51ویں داداصاحب پھالکے ایوارڈ کے لیے مسٹر رجنی کانت کے نام کااعلان کیا۔3مئی کو مسٹر رجنی کانت کو نیشنل فلم ایوارڈ تقریب میں اس اعزازسے نوازاجائیگا۔

مسٹر جاؤڈیکر نے کہا، ’’یہ بتاتے ہوئے خوشی ہورہی ہے کہ سال 2019کا داداصاحب پھالکے ایوارڈ ہندستانی سنیما کی تاریخ میں عظیم فنکاروں میں سے ایک رجنی کانت جی کو دیاجارہاہے ۔



اداکار ،پروڈیوسر اور کہانی کارکے طورپر انکی گراں قدر خدمات ہیں ۔ ‘‘

انھوں نے کہاکہ ،’’مسٹر رجنی کانت ایسے معروف اداکار ہیں جنھوں نے 50سال سے ہندستانیوں کے دلوں پر راج کیاہے ۔1992میں انکی اداکاری والی فلم ’انا ملائی ‘ میری پسندیدہ فلم رہی ہے۔‘‘

مسٹر جاؤڈیکر نے داداصاحب پھالکے ایوارڈ کی سلیکشن کمیٹی کے ممبران آشابھوسلے ،سبھاش گھئی ،موہن لال ،شنکر مہادیون اور بسواجیت چٹرجی کا بھی شکریہ اداکیا۔انھوں نے کہاکہ ایوارڈسلیکشن کمیٹی کے ممبران نے اتفاق رائے سے رجنی کانت کے نام کی حمایت کی جسے حکومت نے قبول کرلیا۔