نشنک نے آئی آئی ایم جموں میں ’آنندم: سنٹر فار ہیپی نیس‘ کا افتتاح کیا

نئی دہلی، 30 مارچ (یواین آئی) مرکزی وزیرتعلیم ڈاکٹر رمیش پوکھریال ’نشنک‘ نے آج یہاں ویڈیو کانفرنسنگ کے ذریعہ آئی آئی ایم جموں میں آنندم: سنٹر فار ہیپی نیس کا افتتاح کیا ڈاکٹر نشنک نے کہا، ’’آج کی اس متحرک دنیا میں جہاں ہم روز نئے نئے چیلنجز کا سامنا کررہے ہیں۔ خصوصاً کورونا جیسی وبا کی وجہ سے نئے چیلنجز کے پیش نظر سبھی کو خاص طور سے طلباء کو اپنی ذہنی صحت پر توجہ دینی ہوگی۔ ذہنی صحت کے بارے میں لوگوں کو حساس بنانا اور انہیں اسے جسمانی صحت کے مساوی ہی اہمیت دینے کے لئے حوصلہ افزائی کرنا،



انتہائی اہم ہے۔ ایسے حالات میں آئی آئی ایم جموں میں خوشی پر مبنی یہ مرکز پوری طرح سے ذہنی فلاح کے لئے وقف ہے۔ یہ اپنے آپ میں ایک نرالی پہل ہے اور یقیناً یہ اپنے قیام کے مقصد کو پوراکرے گا۔

انہوں نے کہا کہ اس بات میں بالکل بھی شک نہیں ہے کہ خوش افرادزیادہ تخلیقی ہوتے ہیں۔ اسی طرح جب کوئی طلبہ مثبت توانائی کا جذبہ پیداکرتا ہے، تو اس میں سیکھنے کی خواہش، مثبت نقطہ نظر، عزم مصمم اور معاشرتی وابستگی کی بھی ترقی ہوتی ہے۔ دراصل حقیقی خوشی اور مثبتیت کا ذریعہ کہیں دورنہیں ہے، بلکہ ہمارے اندر ہی موجود ہے۔