نشنک نےامریکہ میں ہندوستان کےسفیر سےقومی تعلیمی پالیسی پر تبادلہ خیال کیا

نئی دہلی ، 12 جنوری (یواین آئی) مرکزی وزیرتعلیم رمیش پکھریال ’نشنک ‘ نے منگل کے روز امریکہ میں ہندوستان کے سفیر ترنجیت سنگھ سندھو سے ملاقات کر کے ملک کی نئی تعلیمی پالیسی پر تفصیلی تبادلہ خیال کیا اور اس کے امریکہ کے مختلف اعلی تعلیمی اداروں میں اس کی تشہیر کے لئے تعاون طلب کیا ۔

ڈاکٹرنشنک نے مسٹر سندھو کو یہاں کہا کہ ہندوستان کا سفارت خانہ امریکہ کے مختلف اعلی تعلیمی اداروں میں قومی تعلیم پالیسی 2020 کی وسیع پیمانے پر تشہیر کے لئے کئی سیمینار / ویبنار / کانفرنسوں / ورکشاپس وغیرہ کے انعقاد کی کوشش کرسکتا ہے۔ اس طرح کےاہتمام ہندوستانی قونصل خانے کی جانب سے بھی



کئے جا سکتے ہیں۔

انہوں نے مسٹر سندھوسے امریکہ کے ہندوستانی قونصل خانوں سے مشورہ کر کے مختلف فریقین سے یہ معلوم کرنے پر زور دیا کہ ہندوستان میں اپنے کیمپس کھولنے کے لئے امریکی یونیورسٹیوں کی کیا توقعات ہیں ، جس سے اسٹڈی ان انڈیا اسکیم کے تحت امریکی طلباء کوہندوستان میں متوجہ کرنے کے طریقے تلاش کئے جا سکیں۔

مرکزی وزیر نے سفیر کو یہ بھی بتایا کہ رابطے کے تحت امریکہ کی طرف سے مشترکہ تحقیقاتی تجاویز (74.80 کروڑ) کی زیادہ سے زیادہ تعداد کو منظورکیا گیا تھا ۔ انہوں نے کہا ’’ مجھے امید ہے کہ امریکہ میں ہندوستان کاسفارت خانہ اس اسکیم کے فروغ میں اہم کردار ادا کرے گا‘‘ ۔