جے این یو میں اٹل بہاری واجپائی اسکول آف مینجمنٹ اینڈ انٹرپرینیورشپ کا سنگ بنیاد

نئی دہلی، 4 جنوری (یو این آئی) مرکزی وزیر تعلیم ڈاکٹر رمیش پوکھریال 'نشانک' نے آج یہاں جواہر لال نہرو یونیورسٹی میں اسکول آف انجینئرنگ اور اٹل بہاری واجپئی اسکول آف مینجمنٹ اینڈ انٹرپرینیورشپ کا سنگ بنیاد رکھا۔

اس موقع پر مسٹر رمیش پوکھریال نشانک نے کہا کہ وائس چانسلر ایم جگدیش کمار کی دور اندیشی کی بدولت جے این یو میں گزشتہ پانچ سالوں میں بہت سے نئے تعلیمی ادارے شروع کیے گئے ہیں جس سے یقینا ہمارے ملک کی نوجوان نسل کو فائدہ ہوگا



اور یہ دو ادارے خود انحصار ہندوستان مہم میں اہم کردار ادا کریں گے۔

ڈاکٹر نشانک نے کہا کہ "پروفیسرجگدیش کمار ان دونوں اداروں کے ساتھ ساتھ یونیورسٹی میں دیگر انتظامی عمارتوں اور وسائل کا بندوبست کرنے کے لئے حکومت سے ہیفا فنڈ کے تحت ایک بڑی رقم حاصل کرنے میں کامیاب رہے تھے اور مجھے امید ہے کہ اس فنڈ کے استعمال سے جے این یو کا مستقبل مزید مضبوط اور تابناک ہوگا اور یہاں آنے والے طلبہ، ریسرچ اسکالر، اساتذہ کو بھی مناسب سہولیات میسر ہوں گی۔