آر ٹی سی کے عملے پر کرکٹ کے بیٹ سے حملے کے الزام میں 2 گرفتار

حیدرآباد، 5 فروری (ذرائع) آر ٹی سی بس ڈرائیور اور کنڈکٹر پر کرکٹ بیٹ سے حملہ کرنے کے الزام میں دو افراد کو گرفتار کیا گیا ہے۔ یہ واقع 4 فروری اتوار کی رات کا ہے- پولیس کے مطابق موٹر سائیکل پر سوار ملزمان محمد مجید اور محمد قاسم نے خطرناک انداز میں بس کو اوورٹیک کیا۔

لاپرواہی سے گاڑی چلانے سے ناراض بس ڈرائیور نے بائیک سواروں پر شور مچایا اور ان کے ساتھ جھگڑا کیا۔ موٹر سائیکل سواروں نے اپنی گاڑی روکی، بس میں گھس کر ڈرائیور اور کنڈکٹر کو گالی گلوچ کرتے ہوئے کرکٹ کے بیٹ سے مارنا شروع کردیا۔

ہنگامہ آرائی میں ڈرائیور شیخ عبدل شدید زخمی ہوگئے اور کنڈکٹر رمیش کا بایاں بازو ٹوٹ گیا۔ بس کے شیشے بھی ٹوٹ گئے۔

اطلاع ملنے پر ڈومل گوڈا پولیس موقع پر پہنچی اور دونوں کو گرفتار کرلیا۔ انہیں 14 روزہ جوڈیشل ریمانڈ پر بھیج دیا گیا۔

حملے کی مذمت کرتے ہوئے ٹی ایس آر ٹی سی کے ڈائریکٹر وی سی سجنار نے خبردار کیا کہ اگر ٹی ایس آر ٹی سی کے عملے پر حملے جاری رہے تو نتائج بھگتنا پڑیں گے۔