سرکا ری رہائشی اسکول کی طالبہ نے بچے کو جنم دیا،پاکسو کے تحت مقدمہ درج۔سینئر طالب علم سے پوچھ تاچھ

پی ٹی آئی

چکابلاپور:کرناٹک کے سرکاری رہائشی اسکول کی 9ویں جماعت کی طالبہ نے چکا بلاپور کے ایک ہاسپٹل میں ایک بچے کو جنم دیا جو 8ماہ کی حاملہ تھی۔ اس کے واقعہ کے بعد پولیس نے تعزیرات ہند اور پاکسو کے تحت عصمت ریزی کا کیس درج کرلیا۔ 14سالہ لڑکی کرناٹک کے ٹمکور ضلع کے ایک سرکاری رہائشی اسکول کے ہاسٹل میں مقیم تھی۔ یہ معاملہ اس وقت منظر عام پر آیا جب وہ چکابلاپور ضلع کے باگے پلی تعلقہ میں و اقع اپنے گھر آئی اور پیٹ میں درد کی شکایت کی۔ اس کے والدین اسے ہاسپٹل لے گئے جہاں



اسکیانگ کے بعد ڈاکٹرس کو معلوم ہوا کہ وہ حاملہ ہے۔ اس لڑکی کو ہاسپٹل میں شریک کیاگیا اورطبی معائنے اور ضروری ٹسٹوں کے بعد ڈاکٹرس نے 9جنوری کو آپریشن کیا۔ اس لڑکی کا وزن کم تھا لیکن بچے کی حالت مستحکم ہے۔ چائیلڈ ویلفیر کمیٹی نے اس بچی کی کونسلنگ کی۔ کونسلنگ کے دوران اس نے بتایاکہ اسکول کے ایک سینئر نابالغ لڑکے نے اسے حاملہ بنایا لیکن پوچھ تاچھ کے دوران لڑکے نے تردید کی۔ ایک پولیس عہدیدار نے بتایا کہ ہم نے کیس درج کیا ہے لیکن اب تک کسی کو گرفتار نہیں کیا۔ اس دوران ضلع انتظامیہ نے ہاسٹل کے وارڈن کو معطل کردیا۔