گجرات میں دواسازکمپنی میں بوائلر پھٹا، چارافرادہلاک، متعدد زخمی

وڈودرا، 24 دسمبر (یو این آئی) گجرات میں وڈودرا کے مکر پورہ صنعتی علاقے میں آج ایک دوا ساز کمپنی کے پلانٹ میں بوائلر پھٹنے سے ایک خاتون سمیت کم از کم چار مزدور ہلاک اور ایک درجن سے زیادہ زخمی ہو گئے۔

پولیس نے بتایا کہ آج صبح مکر پورہ جی آئی ڈی سی میں واقع دوا ساز کمپنی کینٹن لیبارٹریز کے بوائلر میں اچانک دھماکہ کے بعد آگ بھڑک اٹھی۔



دھماکا اتنا زور دار تھا کہ اس کے اثر سے تقریباً آدھے سے ایک کلومیٹر کے علاقے میں عمارتوں کے شیشے ٹوٹ گئے۔

فائر بریگیڈ کی ٹیم نے موقع پر پہنچ کر آگ پر قابو پالیا۔ مزدوروں نے بوائلر کے قریب ہی رہنے کے لیے مکان بنا رکھا تھا۔ اس حادثے میں مرنے والوں کی تعداد میں مزید اضافے کا خدشہ ہے۔ زخمیوں اور جاں بحق ہونے والوں میں بچے بھی شامل بتائے جاتے ہیں۔