حیدرآباد میں رام نومی ریلی میں گوڈسے کی تصویر لہرانے والا شخص گرفتار

حیدرآباد: شاہناتھ گنج پولیس نے 30 مارچ کو سری رام نومی شوبھا یاترا کے دوران گاندھی جی کے قاتل ناتھورام گوڈسے کی تصویر رکھنے والے شخص کو گرفتار کرلیا۔ ملزم کی شناخت چنتا ہیما کمار (21) کے طور پر کی گئی ہے جو گچی باؤلی میں صدیق نگر کا رہنے والا ہے۔ 

پولیس کے مطابق، کمار نے ناتھورام کی تصویر اٹھا رکھی تھی، جس نے 1948 میں مہاتما گاندھی کو گولی مار کر قتل کر دیا تھا۔ کمار کی تصویر پکڑے ہوئے اور جلوس میں مارچ کرتے ہوئے ایک



ویڈیو کلپ وائرل ہوا تھا اور سوشل میڈیا پر اس کی شدید تنقید ہوئی تھی۔ پولیس نے واقعہ کے بعد آئی پی سی کی 504 کے تحت مقدمہ درج کرکے اسے گرفتار کرلیا۔

کمار کو مقامی مجسٹریٹ کے سامنے پیش کیا گیا اور ریمانڈ پر لیا گیا۔

حیدرآباد میں رام نومی ریلی میں گوشا محل بی جے پی کے معطل ایم ایل اے راجہ سنگھ بھی مرکزی جلوس میں شامل ہوئے جب یہ منگل ہاٹ سے گزرا۔ وہیں گوڈسے کی تصویر نمودار ہوئی۔ سنگھ کی ریلی میں شامل لوگوں نے مہاتما گاندھی کے قاتل کی تصویریں لہرائیں۔