جگتیال میں آرٹی سی بس میں سفرکے دوران مسلم خاتون کو مارنے والے سب انسپکٹر پر مقدمہ درج

جگتیال میں آرٹی سی بس میں سفرکے دوران سیٹ کے مسئلہ پر ہوئی معمولی بحث وتکرار کے بعد سب انسپکٹر پولیس کی جانب سے برقعہ پوش خاتون کو طمانچہ رسید کرنے کے واقعہ کی اطلاع کے بعد جگتیال ضلع کے مسلمانوں میں برہمی کی لہر دوڑ گئی۔

جگتیال کے علاوہ کورٹلہ اور مٹ پلی میں مسلمانوں کی جانب سے سڑک پر احتجاجی دھرنے منظم کیے گئے ۔ بیرسٹر اسد الدین اویسی کی ہدایت پر رکن اسمبلی یاقوت پورہ جناب احمد پاشاہ قادری نے ضلع ایس پی بھاسکر سے فون پر بات کی اور پولیس کی جانب سے خاتون کے ساتھ اس طرح برتاؤ کرنے پر افسوس کا اظہار کیا اور فورا پولیس عہدیداروں کے خلاف کیس درج کرنے اور معطل کرنے کا مطالبہ کیا۔ اس واقعہ کی اطلاع ملنے پر صدر



ٹاؤن کریم نگر سید غلام احمد حسین نے سابقہ ایم پی ونود کمار،سنجےکمار رکن اسمبلی سے نمائندگی کی۔ 

اس واقعہ پر جگتیال مجلس کے صدریونس ندیم و مجلس کے دیگر قائدین نے جگتیال کے دورے میں مصروف رکن کونسل کلواکنٹلہ کویتا اور رکن اسمبلی ڈاکٹر سنجے کمار اور ضلع ایس پی جگتیال سے ملاقات کرتے ہوئے خاطی سب انسپکٹر کے خلاف کارروائی کرنے کا مطالبہ کیا ۔اس کے علاؤہ صدر ملت اسلامیہ محمد عبدالباری و کانگریس لیڈر سراج الدین منصور نیہال اور دیگر قائدین نے ڈی ایس پی سے نمائندگی کی۔ نوجوانوں اور جگتیال کے سبھی علاقوں سے جمع ہوئے لوگوں نے بڑے پیمانے پر سخت احتجاج کیا، سڑکوں کو بند کردیا گیا تھا۔ آخر کار پولیس نے کیس درج کرلیا ہے مزید تفتیش جاری ہے۔