پیاز کی قیمتوں میں اضافہ ،فی کلو70روپئے میں فروخت

آنے والے دنوں میں مزید اضافہ کا امکان 

دہلی :عام اور متوسط ​​طبقے کے لوگ پہلے ہی اشیائے ضروریہ کی آسمان چھوتی قیمتوں سے مختلف دشواریوں کا سامنا کررہے ہیں۔ایسی صورتحال میں پیاز کی قیمتیں پھر ایک بار پر لگ گئے ہیں اور خواتین کچن میں چولہا جلانے میں پس وپیش کررہی ہیں۔

حال حال تک فی کلو پیاز کی قیمت 30-20 روپئے تھی، لیکن اب دارالحکومت دہلی کے علاوہ ملک کے مختلف شہروں میں تقریباً 70سے80 روپئے فی کلو ہے۔ غازی پور سبزی منڈی میں پیاز کے ایک تاجر نے بتایا کہ آج فی پانچ کلو پیاز کی قیمت350روپئے تک پہنچ گئی ہے۔ تاجر نے بتایا کہ گذشتہ روز فی پانچ کلو پیاز 300 روپئے میں فروخت ہوئی۔ انہوں نے کہا کہ اس سے ایک روز قبل پیاز کی قیمت 2 سوروپئے تھی۔ انہوں نے کہا



کہ پیاز کی قیمت میں ایک ہفتے سے اضافہ ہورہاہے۔اور اس کی وجہ کم پیداوار ہے۔

ایک اور تاجر نے کہا کہ آنے والے دنوں میں پیاز کی قیمتوں میں مزید اضافہ ہونے کا امکان ہے۔ انہوں نے کہا کہ نوراتری سے پہلے ایک کلو پیاز کی قیمت 50 روپے تھی اب 70 روپے تک پہنچ گئی ہے۔ ان کا کہنا تھا کہ وہ اسے 80 روپے میں صارفین کو فروخت کر رہے ہیں کیونکہ اس کی قیمت 70 روپے ہے۔ انہوں نے کہا کہ حال حال تک پیاز کی قیمت 30 سے ​​40 روپئے فی کلوتھی۔ اگر قیمتوں میں اضافہ کا سلسلہ اسی طرح جاری رہا تو پیاز کی قیمت 100 روپے فی کلو تک پہنچ جائے گی۔ پیاز کے ساتھ ساتھ ٹماٹر کی قیمتیں بھی بڑھ رہی ہیں۔ ٹماٹر جو پہلے 20 روپئے فی کلو دستیاب تھا اب 40 سے 45 روپئے میں فروخت ہورہا ہے۔ 

تاجروں کا ماننا ہے کہ آنے والے دنوں میں ٹماٹر کی قیمت70روپئے تک پہنچنے کا امکان ہے۔